Làrach-lìn Ainm-àite Ùr

An robhar a-riamh tro chèile mu mhìneachadh ainm-àite air soidhne dà-chànanach, air neo tùs an ainm? Nan robh, tha am freagairt ri làimh. Chaidh an làrach-lìn ùr aig Ainmean-Àite na h-Alba (AÀA), an compàirteachas comhairleachaidh nàiseanta airson ainmean-àite Gàidhlig an Alba, a chur air bhog an-diugh (22 Sultain 2017).

A’ leantainn taic-airgid de £7,100 bho Riaghaltas na h-Alba, tha an làrach-lìn ùr a’ gabhail a-steach an stòr-data cliùiteach aig AÀA, a tha ri fhaotainn an-asgaidh. Bidh an stòr-dàta a’ tabhann riochdan deimhinnte a dh’fhaodas ùghdarrasan ionadail, na meadhanan, luchd-rannsachaidh, coimhearsnachdan ionadail, luchd-coiseachd is luchd-streip no duine sam bith le ùidh ann an ainmean-àite Gàidhlig, a chleachdadh.  Tha fiosrachadh eachdraidheil, tùsan ionadail agus faidhlichean-fuaim gus cuideachadh le fuaimneachadh cuideachd rim faotainn san stòr-dàta.

Thuirt Roy Pedersen, Cathraiche AÀA: “Rinn an dithis luchd-obrach aig AÀA, Eilidh Sgaimeal is Jake King, agus Vanessa Lopez is Chris Mitchell bho Lumberjack Digital an t-uabhas obair ann a bhith cruthachadh an goireas air-loidhne fa-leth seo. Tha mi gu mòr gam moladh airson ga chur ri chèile ann an dòigh èifeachdach. Taing mhòr gu Riaghaltas na h-Alba a thug seachad taic-airgid airson a’ phròiseict nuair a bha sinn a’ strì gus an ionmhas a bha a dhìth a lorg. Tha an uidhir le ùidh ann an ainmean-àite agus a’ Ghàidhlig a sìor fhàs, gu sònraichte luchd-tadhail bho air feadh an t-saoghail a fhuair spionnadh bhon phrògram ‘Outlander’. Tha mi cinnt às gum faigh iad tòrr às an làraich-lìn ùr, ach tha mi ’n dòchas gum bi e a’ tarraing luchd-cleachdaidh nas farsaing dhan taobh inntinneach seo de chultar is dhualchas Alba.

A’ cur fàilte air cur air bhog an làrach-lìn ùr thuirt an Leas Phrìomh Mhinistear John Swinney: “Tha sinn glè thoilichte gun robh an cothrom againn taic a thoirt dhan làrach-lìn ùr seo, a bhios na ghoireas feumail airson mòran dhaoine mar phrìomh thùs airson ainmean-àite Gàidhlig.

“Tha Riaghaltas na h-Alba ag aithneachadh gu bheil Gàidhlig na phàirt chudromach de dhualchas, de dhearbh-aithne nàiseanta agus de bheatha chultarail na h-Alba san latha an-diugh, agus tha sinn a’ cur fàilte air iomairtean den leithid a chumas taic ri suidheachadh na Gàidhlig ann am beatha làitheil, a’ cuideachadh gus a cumail seasmhach san àm ri teachd.”

Gheibh luchd-cleachdaidh greim air faidhlean PDF luachmhor de dh’ainmean-àite, goireasan rannsachaidh, agus mapa didseatach a’ cleachdach a’ bhathar-bhog fosgailte aig an Suirbhidh Òrdanais.

Thuirt Oifigear Gàidhlig, streapadair is neach-cleachdaidh AÀA, Janni Diez, a tha stèidhichte aig Sabhal Mòr Ostaig, a’ cholaiste Ghàidhlig san Eilean Sgitheanach: “’S e goireas air leth a th’ anns an làrach-lìn ùr, agus tha e a-nis fiù ’s nas fhasa tuilleadh fhaighinn a-mach mu ainmean-àite. Is fìor thoil leam mar a tha mapa ann a ghabhas sgrùdadh airson ainmean, agus mar a gheibhear comharra-clèithe le bhith a’ bruthadh air.”