Mar an com-pàirteachas comhairleachaidh nàiseanta airson ainmean-àite Gàidhlig ann an Alba, tha AÀA a’ leantainn stiùireadh sònraichte gus ainmean-àite a rannsachadh. Tha an stiùireadh seo air a dhealbh gus dèanamh cinnteach gu bheil riochdan Gàidhlig nan ainmean-àite air an aontachadh ann an dòigh cho-òrdanaichte gu inbhe nàiseanta, le sin a’ neartachadh am buaidh air leasachadh is cleachdadh na Gàidhlig, agus a’ lùghdachadh ùine is mì-chinnt dhaibhsan a tha a’ cur phoileasaidhean le ainmean-àite Gàidhlig an gnìomh.
Thathar cuideachd ag amas air teistealachd a thoirt do na h-ainmean-àite am measg luchd na Gàidhlig is na Beurla, agus cleachdadh coitcheann a bhrosnachadh.
Chaidh Poileasaidh Ainmean-àite Gàidhlig ùr AÀA a chur air bhog san t-Samhain 2019 cuide ri liosta de litreachadh a thathar a’ moladh airson faclan cumanta ann an ainmean-àite is soidhnichean, agus liosta de bhriathran a thathar a’ moladh mar stiùireadh airson ainmean Gàidhlig ùra a chruthachadh, far a bheil sin iomchaidh, leithid ainmean sràide.
Tha an dreachd as ùire de Ghnàthachas Litreachaidh na Gàidhlig (2009) a’ gabhail pàirt mhòr sna poileasaidhean aig AÀA. Gheibh sibh lethbhreac bho làrach-lìn Ùghdarras Theisteanas na h-Alba (SQA).
