Ainmean-àite ann an abairtean Gàidhlig

Mar phàirt de Seachdain na Gàidhlig 2026 chaidh post a sgaoileadh gach latha le abairt Ghàidhlig is ainm-àite an sàs ann. Seo agaibh na h-abairtean gu h-ìseal.

Diluain 23 Gearran

Bho Pheairt gu Hiort. Tha na h-àitichean seo aig gach oir na Gàidhealtachd. Tha an abairt a’ ciallachadh “air feadh an àite”

Dimàirt 24 Gearran

Cho bodhar ri Creig Chluaidh.

Diciadain 25 Gearran

Fiodh gu Loch Abar. Chan eil gainnead fiodha ann an Loch Abar!

Diardaoin 26 Gearran

Tha dà thaobh air a’ Mhaoil agus seachd seallaidhean dhith. Tha an abairt seo a’ ciallachadh gu bheil iomadh dòigh ann a bhith a’ coimhead air rud sam bith. Maol Chinn Tìre

Dihaoine 27 Gearran

Cho glas ri càl Obar Dheathain. A rèir coltais, chan eil rud sam bith cho glas ri càl Obar Dheathain!

Disathairne 28 Gearran

Mar Dhubhaird is Dhùn Olla mu choinneimh a chèile. Canar seo mu dhaoine a tha eòlach air a chèile, ach chan eil iad dlùth. Chithear Dubhaird bho Dhùn Olla, ach chan eil na caistealan seo faisg air a chèile.

Didòmhnaich 1 Màrt

Is fhada Dùn Èideann bhon fhear a tha ag èirigh sa Stòir. Ged a tha an riaghaltas ann an Dùn Èidinn, agus bidh co-dhùnaidhean cudromach gan dèanamh an sin, chan eil seo gu tric a’ buintainn ri daoine ann an àiteachan fad às, coltach ris an Stòir. Tha ùidh aig daoine anns na tha a’ tachairt anns an àite far a bheil iad.