Làraich nam Blàr

Chaidh rannsachadh a dhèanamh le Ainmean-Àite na h-Alba (AÀA) as leth Àrainneachd Eachdraidheil Alba (HES) air Clàr Làraich nam Blàr bho chionn goirid gus cur ris an fhaclair aig HES. Chaidh am faclair stèidheachadh gus taic a thoirt do dh’eadar-theangachadh air cuspairean ceangailte ri àrainneachd eachdraidheil an Alba.

Thathar air a bhith ri obair gu leòr sna bliadhnaichean a dh’fhalbh gus rannsachadh a dhèanamh air iomadh làrach HES agus taic a chumail ris an fhaclair aca. ’S e rannsachadh air clàr làraich nam blàr an liosta as ùra a chaidh a dhèanamh. Liosta air leth cudromoch gu nàiseanta a’ clàradh làraich bhlàran chudromach ann an Alba. Tha an clàr a’ toirt seachad fiosrachadh gus aire a thogail air urram nan làraich gus an glèidheadh san àm ri teachd.

Thuirt Curstaidh NicDhòmhnaill, Oifigear Gàidhlig Àrainneachd Eachdraidheil Alba, “Tha sinn air leth toilichte an liosta ùr seo fhaighinn bho AÀA. Tha am briathrachas seo a’ cuideachadh le cunbhalachd anns an eadar-theangachadh againn, agus do sgoiltean. Bha na blàran seo uile cudromach ann an eachdraidh na h-Alba agus tha e inntinneach na h-ainmean Gàidhlig fhaicinn, a tha uaireanan gu math diofraichte bho na h-ainmean Beurla.”

Thuirt Eilidh Sgaimeal, Manaidsear Pròiseict Ainmean-Àite na h-Alba:

“Tha e na amas dha AÀA a bhith rannsachadh riochdan ainmean-àite de dh’iomadh seòrsa agus cleachdadh nan riochdan seo a bhrosnachadh. Mar sin tha e na thlachd mhòr dhuinn a bhith an sàs anns an fhaclair aig HES, goireas air leth chudromach gus teirmichean agus ainmean-àite ceangailte ris an àrrainneachd eachdraidheil a thoirt am follais.”

Gheibhear barrachd fiosrachaidh mu na làraich fo ‘Battlefields’ agus liosta Gàidhlig nam blàr tron fhaclair aig HES, air neo ann an cruth PDF bho làrach-lìn AÀA.