AINMEAN-ÀITE NA H-ALBA A’ CUR FÀILTE AIR CATHRAICHE ÙR

Chaidh cànanaiche Gàidhlig à Uibhist a Deas ainmeachadh mar Cathraiche ùr Ainmean-Àite na h-Alba (AÀA), am buidheann nàiseanta airson ainmean-àite na h-Alba aontachadh.

Tha Ruaraidh Mac an t-Saoir, a tha na fhacladair, eadar-theangair is seinneadar Ghàidhlig, a’ gabhail an dreuchd às dèidh Roy Pedersen, ùghdar den chiad mhapa Ghàidhlig de dh’Alba, a bha na chathraiche airson AÀA airson ochd bliadhna gu leth.

Bidh AÀA a’ toirt stiùireadh dha iomadh buidheann airson stuthan a leithid: soidhnichean rathaid dà-chànanach agus Gàidhlig, soidhnichean malairteach, mapaichean, taisbeanaidhean agus rannsachadh, agus a’ faighinn a phrìomh mhaoineachaidh bho Bhòrd na Gàidhlig.

Tha ùidh mhòr air a bhith aig Ruaraidh ann an cànan is cultar nan Gàidheal fad a bheatha agus rinn e Gàidhlig aig Oilthigh Ghlaschu, far an do thog e ùidh ann an ainmean-àite, a’ rannsachadh ainmean-àite Bheinn a’ Bhaoghla airson an trachdais aige. Às dèidh ceumnachadh ann an 2014 fhuair e obair ann am poileasaidh Gàidhlig le Riaghaltas na h-Alba, agus ’s ann tron obair seo a thàinig e gu bhith na riochdaire airson an Riaghaltais air comataidh AÀA, far an tug e seachad taic a bha buileach feumail. Dh’fhàg Ruaraidh Riaghaltas na h-Alba ann an 2020 gus trèanadh mar fhacladair airson Faclair na Gàidhlig, agus thug AÀA cuireadh dha fuireach mar Leas-Chathraiche neo-eisimeileach na buidhne.

Tha an t-eòlas a tha Ruaraidh air togail mar phàirt den chomataidh aig AÀA fad seachd bliadhna gu leth, agus an dìorras is an t-eòlas aige mun chànan agus cànanachas, ga dhèanamh na shàr-thagraiche airson Cathraiche.

A’ gabhail na dreuchd, thuirt Ruaraidh: “’S e fìor urram a th’ ann gun deach m’ ainmeachadh mar Chathraiche air AÀA. Leis a’ Ghàidhlig a’ sìor fhàs nas fhollaisiche ann an Alba tro phlanaichean Gàidhlig agus mothachadh mun chultar, tha e cho cudromach ’s a bha e riamh gu bheil rannsachadh ceart agus cunbhalachd ann an ainmean-àite Gàidhlig air an cur air adhart do bhuidhnean agus don phoball. Tha mi airson taing a thoirt do Roy Pedersen a bha na Chathraiche romham airson a thaic agus stiùireadh a bha air leth luachmhor do AÀA sna h-ochd bliadhna a dh’fhalbh, agus tha mi ’n dòchas gun lean mi eisimpleir airson an dreuchd riatanach a th’ aig AÀA airson Gàidhlig ann an Alba san latha an-diugh a chumail a’ dol.”

Thuirt Jo NicDhòmhnaill bho Chomhairle na Gàidhealtachd, Leas-Chathraiche AÀA: “Tha Comhairle na Gàidhealtachd a’ cur luach mòr air an eòlas ionmholta a th’ aig Ainmean-Àite na h-Alba agus air an rannsachadh mhionaideach a bhios iad a’ dèanamh air tùsan eachdraidheil. Tha sinn fìor thoilichte fàilte a chur air Ruaraidh Mac an t-Saoir gu dreuchd a’ Chathraiche. Mar neach aig an robh a’ Ghàidhlig on ghlùin, agus a th’ air a bhith ri obair sgoilearach sa chànan, tha Ruaraidh a’ toirt eòlas cudromach is iomadh buannachd chun na buidhne. Bu toil leinn cuideachd taing a thoirt do Roy Pedersen airson na thug e fhèin seachad a thaobh eòlas is ùine thar nam bliadhnaichean. Tha sinn a’ coimhead air adhart ri bhith a’ togail air an dàimh-obrach mhath is thorrach a tha againn le AÀA agus na com-pàirtichean aca.” Thuirt Shona NicIllinnein, Ceannard, Bòrd na Gàidhlig: “Tha sinn a’ cur fàilte air an naidheachd seo gun deach Ruaraidh Mac an t-Saoir ainmeachadh mar Chathraiche Ainmean-Àite na h-Alba. Tha AÀA a’ dèanamh obair chudromach ann a bhith a’ leasachadh cleachdadh na Gàidhlig agus a’ toirt seachad deagh chomhairle do dh’iomadach buidheann. Chan e sin a-mhàin ach gu bheil iad a’ cur ri amasan a’ Phlana Nàiseanta gus Gàidhlig àbhaisteachadh. Tha sinn a’ guidhe gach soirbheachas do Ruaraidh na dhreuchd ùr.”